,,Ég held að við höfum ekki átt mikið meira skilið út úr þessum leik en þetta," sagði Andri Ólafsson leikmaður Grindavíkur eftir 1-1 jafntefli við Þrótt í 1. deildinni í kvöld en liðinu hefur gengið illa í sumar og var að ná í sitt fjórða stig úr fimm leikjum í sumar. Andri var ekki sammála fréttamanni Fótbolta um að Grindavík hafi byrjað vel en áminntur um að þeir hafi haldið boltanum vel sagði hann.
Lestu um leikinn: Grindavík 1 - 1 Þróttur R.
,,Jájá, við gerum það alltaf. Við erum yfrleitt meira með boltann og höldum honum þokkalega en við sköpum ekki neitt og opnum ekki neitt," sagði Andri en aðspurður hvort liðið yrði ekki að nýta færin sem þeir þó fengu í byrjun og lok leiksins sagði hann.
,,Ég veit það ekki, ég hef þá verið að horfa á einhvern annan leik því mér fannst við ekki opna neitt að viti. Þótt við séum að spila ágætlega upp völlinn erum við ekki að fá færi eða koma okkur í góðar stöður. Þetta hefur farið hræðilega af stað og virðist ætla að halda áfram."
Fjórða stig Grindavíkur í sumar en Andri er hundsvekktur með gengið. ,,Já það er stig og þetta safnast saman en við verðum að fara að skoða hvað við erum að gera. Við erum með alltof sterkt lið til að vera í svona fíflaríi. Það er engin flækja, það er ekki sagt að liðið ætl beint upp án þess að það sé eitthvað á bakvið það, það er fullt á bakvið það. En eins og staðan er núna erum við að spila okkur út úr þessu móti og sumarið gæti klárast ansi fljótt.
