Ný Covid tilfelli hjá Man City - Pep hrósar Tuchel í hástert

„Við erum með ný Covid tilfelli," sagði Pep Guardiola, stjóri Manchester City, á fréttamannafundi í dag. City mætir Chelsea í stórleik í hádeginu á morgun.

„Sumir eru að greinast jákvæðir í annað sinn. Við höfum lent í mörgum tilfellum og meiðslum ofan á það. Við höfum verið að spila með akademíuleikmenn á bekknum, við erum í sömu stöðu og öll önnur félög."

Manchester City hefur ekki nafngreint þá sem missa af leiknum á morgun.

„Við höfum þurft að taka einn dag í einu og taka ákvarðanir nokkrum klukkustundum fyrir æfingar eða leiki. Stundum er allt í góðum málum en svo fjórum eða fimm klukkustundum síðar erum við komnir með smit."