Slóvenski markvörðurinn Samir Handanovic er nú alvarlega að íhuga það að leggja hanskana á hilluna.
Þessi 39 ára gamli leikmaður er án félags eftir að samningur hans við ítalska félagið Inter rann út í sumar.
Handanovic hefur átt farsælan feril til þessa en hann var á mála hjá Inter í ellefu ár þar sem hann vann ítölsku deildina einu sinni, en auk þess lék hann með Udinese í átta ár.
Slóvenski markvörðurinn var með bestu markvörðum Seríu A um árabil en hann er enn án félags eftir að hafa yfirgefið Inter í sumar og er nú útlit fyrir að hann hafi spilað sinn síðasta leik á ferlinum.
Handanovic er að íhuga það að leggja hanskana á hilluna og gæti honum boðist að vinna fyrir Inter en ekki kemur fram hvaða stöðu hann myndi gegna.
Á ellefu ára landsliðsferli hans með Slóveníu lék hann 81 landsleik en hann hætti að spila með landsliðinu fyrir átta árum er liðinu mistókst að komast á Evrópumótið í Frakklandi. Hann rétti því Jan Oblak keflið, sem hefur verið aðalmarkvörður síðan.
Athugasemdir
