England: Chelsea rétt marði tíu leikmenn Fulham

Fulham og Chelsea áttust við í Lundúnaslag í enska boltanum og úr varð hörkuleikur.

Fyrri hálfleikurinn var nokkuð tíðindalítill þar til undir lokin þegar Antonee Robinson fékk beint rautt spjald fyrir hættulega tæklingu.

Tíu leikmenn Fulham lentu ekki í miklum erfiðleikum í síðari hálfleik þar sem lærisveinar Frank Lampard virkuðu afar bitlausir og ósannfærandi.

Lærisveinum Scott Parker leið vel allt þar til á 78. mínútu þegar Mason Mount kom Chelsea yfir. Hann nýtti sér þá frákast innan teigs og skoraði, hægt að setja spurningarmerki við Alphonse Areola í markinu sem blakaði knettinum á Mount en átti góðan leik þar fyrir utan.

Tíu leikmenn Fulham reyndu að sækja jöfnunarmark en orkan var ekki til staðar og lokatölur 0-1. Mikilvæg stig fyrir Chelsea sem er í sjöunda sæti, með 29 stig eftir 18 umferðir.

Nýliðar Fulham eru í fallsæti með 12 stig.