Danski miðjumaðurinn Michael Præst er nýr fyrirliði hjá Stjörnunni en hann tekur við fyrirliðbandinu af Daníel Laxdal.
,,Það er alltaf mikill heiður að vera með fyrirliðabandið. Þetta var ákvörðun sem var tekin af öllu liðinu, fyrrum fyrirliðanum og þjálfaraliðinu. Ég er stoltur af því að vera með bandið og reyni áfram að gera mitt besta fyrir Stjörnuna," sagði Præst við Fótbolta.net eftir 2-2 jafnteflið gegn Víkingi R. í Lengjubikarnum í kvöld.
Præst fékk rauða spjaldið í leiknum í kvöld þegar hann braut á Ívari Erni Jónssyni sem var að sleppa í gegn. Ívar Örn skoraði síðan jöfnunarmarkið úr aukaspyrnunni.
,,Þetta er ákvörðun dómarans og ég get ekkert gert í þessu núna. Það var synd að enda leikinn á þennan hátt en þetta er bara svona. Ég er mjög heiðarlegur leikmaður og þetta er mitt fyrsta rauða spjald. Þetta var slys en dómarinn taldi að þetta væri rautt spjald."
Præst er bjartsýnn fyrir komandi tímabil með Stjörnunni. ,,Þú reynir alltaf að gera betur en árið áður en við vitum ekki núna hvernig liðið verður og hvernig önnur lið munu líta út þegar tímabilið byrjar. Það erfitt að tala um væntingar núna."
Hér að ofan má sjá viðtalið í heild sinni.
Athugasemdir
