Stjarnan vann 4-2 sigur á Breiðablik í 16. umferð Bestu deildar kvenna í kvöld. Sigur Stjörnunnar virtist ekki ætla að vera í neinni hættu í stöðunni 3-2 en Blikum tókst að minnka muninn í 3-2 undir lok leiks og hleypa spennu í leikinn áður en Stjarnan gulltryggði stigin þrjú með fjórða markinu í uppbótartíma
„Ég fékk nú ansi mikla útrás þegar Andrea setti fjórða markið, þá öskraði ég þessi stig heim en tilfinningin þegar það var komið 3-2 var bara alls ekki góð," sagði Kristján Guðmundsson, þjálfari Stjörnunnar í leikslok.
„Við erum búin að vera með leik í 3-0 fyrir norðan og ósjálfrátt þá leitaði hugurinn náttúrlega í það, af hverju værum við að gefa þetta eftir við hljótum að vera búnar að læra eitthvað. Breiðablik þú sást það bara allan tímann, þær gáfust aldrei upp Blikarnir, aldrei nokkurn tímann þannig að þetta var of mikil værukærð. Við erum ekki ánægð með þetta og þurfum að skoða þetta."
Lestu um leikinn: Stjarnan 4 - 2 Breiðablik
Elín Metta Jensen, sem lagði skóna á hilluna eftir síðasta tímabil samdi í gær við Þrótt R., en Elín hafði mætt á æfingar með Stjörnunni í apríl. Var Kristján svekktur að missa af henni?
„Neinei, eigum við ekki að segja bara það að hlutir eins og svona að þeir eiga bara að gerast. Það eru aldrei tilviljanir í þessu og ég held bara að liðið okkar hafi sýnt í kvöld að við svöruðum því að hvort sem einhver kemur eða fer þá verður einhver að stíga upp og núna kom Hulda með fyrsta markið sitt og það er mjög gott. Þannig að neinei svona hlutir eiga bara að gerast, við verðum að trúa á það að það eru aldrei neinar tilviljanir til."
En reyndi Stjarnan að fá Elínu Mettu til liðs við sig?
„Uu við vorum í sambandi við hana já já, en ekkert hérna undir lokin reyndar," sagði Kristján að lokum.
Nánar er rætt við Kristján í spilaranum hér fyrir ofan.
