Sjö umferðir eru búnar í Bestu deild karla og Víkingar tróna á toppi deildarinnar með fullt hús, þremur stigum á undan Val sem er í öðru sæti. Breiðablik er í fjórða sætinu, rétt á undan grönnum sínum í HK sem hafa komið á óvart.
Hér eru ellefu leikmenn, og einn þjálfari, sem hafa byrjað Bestu deildina af miklum krafti.
Hér eru ellefu leikmenn, og einn þjálfari, sem hafa byrjað Bestu deildina af miklum krafti.
Ingvar Jónsson, markvörður Víkings - Hefur aðeins fengið á sig eitt mark á tímabilinu til þessa! Reyndar hefði hann sjálfur viljað gera betur í því marki en það það hefur reynst þrautinni þyngri að koma boltanum framhjá Ingvari.
Oliver Ekroth, varnarmaður Víkings - Sá hefur verið öflugur í vörn Víkinga, að margra mati besti leikmaður deildarinnar til þessa. Étur flesta andstæðinga upp til agna og skilar mörkum að auki á hinum enda vallarins.
Gunnar Vatnhamar, varnar- og miðjumaður Víkings - Hefur passað eins og flís við rass í lið Víkinga síðan hann kom til félagsins rétt fyrir mót. Færeyski landsliðsmaðurinn hefur átt draumabyrjun í íslensku Bestu deildinni.
Gísli Eyjólfsson, miðjumaður Breiðabliks - Þessi frábæri leikmaður hefur verið ofboðslega dýrmætur fyrir Blika í upphafi mótsins. Skoraði sigurmarkið gegn KR í síðustu umferð sem var hans fjórða mark í deildinni.
Kristinn Freyr Sigurðsson, miðjumaður Vals - Illviðráðanlegur í Valsbúningnum. Maðurinn sem lætur hjólin snúast á miðsvæðinu og á stóran þátt í því að liðið hefur verið að raða inn mörkum.
Arnþór Ari Atlason, miðjumaður HK - Virðist hafa fundið neistann á ný og gengið í gegnum endurnýjun lífdag. Verið algjörlega frábær fyrir spútniklið HK.
Birnir Snær Ingason, vængmaður Víkings - Einn skemmtilegasti leikmaður deildarinnar hefur verið að leika sér að andstæðingum sínum alveg frá því að fyrsta umferðin var flautuð á.
Ólafur Karl Finsen, sóknarmaður Fylkis - Ef nýliðar Fylkis ætla að halda sér í deildinni er alveg ljóst að þeirra hæfileikaríkasti fótboltamaður þarf að haldast heill.
Örvar Eggertsson, sóknarmaður HK - Hefur komið öllum á óvart og er kominn með fimm mörk í Bestu deildinni. Sjálfstraustið geislar af honum og það virðist stefna í hans langbesta tímabil á ferlinum.
Adam Ægir Pálsson, sóknarmaður Vals - Hefur farið með himinskautum með nýju liði. Marka- og stoðsendingavél í besta sóknarliði deildarinnar til þessa. Gangandi auglýsing fyrir Bestu deildina.
Stefán Ingi Sigurðarson, sóknarmaður Breiðabliks - Kann svo sannarlega listina að skora. Raðaði inn mörkum með HK í Lengjudeildinni í fyrra og er nú farinn að raða inn í Bestu fyrir Blika. Sex mörk og hann er markahæstur í deildinni.
Athugasemdir