Hér má sjá tólf sem hafa farið illa af stað í Bestu deildinni þetta tímabilið. KR á þar flesta fulltrúa en liðið vermir botnsætið. Fyrir mótið voru miklar vonir og væntingar í Vesturbænum en liðið hefur ekki skorað mark í síðustu fimm leikjum.
Ólafur Íshólm Ólafsson, markvörður Fram - Fram hefur fengið sextán mörk á sig á tímabilinu, ekkert lið hefur fengið fleiri á sig. Ólafur fékk talsverða gagnrýni á sig í fyrra en er með traust Jóns Sveinssonar.
Dani Hatakka, varnarmaður FH - Var flottur með Keflavík í fyrra en hefur ekki náð að finna sig með FH. Varnarleikurinn heldur áfram að vera hausverkur í Hafnarfirðinum.
Sindri Þór Ingimarsson, varnarmaður Stjörnunnar - Kom öflugur inn í Stjörnuliðið í fyrra en hefur átt erfitt uppdráttar í slakri byrjun Stjörnunnar þetta tímabilið.
Kristinn Jónsson, varnarmaður KR - Einn besti bakvörður deildarinnar í fjöldamörg ár hefur verið heillum horfinn á þessu tímabili.
Olav Öby, miðjumaður KR - Norska sendingin í Vesturbæinn hefur ekki virkað hingað til. Öby hefur verið slakur líkt og Simen Kjellevold markvörður.
Filip Valencic, miðjumaður ÍBV - Miklar væntingar voru gerðar til slóvenska miðjumannsins í Vestmannaeyjum en hann verið mikil vonbrigði hingað til.
Jóhann Árni Gunnarsson, miðjumaður Stjörnunnar - Þessi hæfileikaríki leikmaður hefur verið ólíkur sjálfum sér og gert alltof mörg mistök.
Atli Sigurjónsson, sóknarmaður KR - Er ekki enn kominn í gang á tímabilinu og það er áhyggjuefni fyrir Vesturbæinga. Leikmaður sem getur skapað og skorað.
Pætur Peterson, sóknarmaður KA - Færeyingurinn er í aðlögunarferli sem hefur gengið hægar en vonast var til á Akureyri.
Jordan Smylie, sóknarmaður Keflavíkur - Stuðningsmenn Keflavíkur hafa ekki getað brosað yfir frammistöðu Ástralans hingað til og eru hreinlega farnir að efast um getu hans.
Kristján Flóki Finnbogason, sóknarmaður KR - KR-ingum er fyrirmunað að skora, ekkert mark í síðustu fimm leikjum. Í sókninni treysta KR-ingar á Kristján Flóka en hann hefur ekki náð að standa undir því trausti.
Rúnar Kristinsson, þjálfari KR - Starfsöryggi Rúnars hefur verið talsvert í umræðunni enda byrjun KR á tímabilinu gríðarleg vonbrigði.
Athugasemdir
