Enska fótboltasambandið ákærði Toney í desember síðastliðnum fyrir að hafa brotið veðmálareglur alls 262 sinnum. Toney játaði sök í mörgum af þessum ákæruliðum. Leikmenn í ensku úrvalsdeildinni mega ekki veðja á fótbolta, hvar sem hann er spilaður.

Toney fékk líka sekt að andvirði 8,75 milljóna íslenskra króna og viðvörun um að gera þetta ekki aftur. Hann má byrja að mæta á æfingar 17. september en fær ekkert að spila fyrr en eftir áramót. Er það mikið áfall fyrir Brentford.

Brentford hefur gefið út yfirlýsingu vegna tíðindanna. Þar kemur fram að félagið er að bíða eftir því að fá í hendurnar skrifleg svör í kjölfar yfirheyrslunnar sem Ivan Toney fór í fyrr í þessari viku. Í kjölfarið mun Brentford svo kanna hvort félagið geti aðhafst eitthvað í málinu.