fim 18. maí 2023 15:58
Ívan Guðjón Baldursson
Mjólkurbikarinn: Grindavík með sýningu á Hlíðarenda
Mynd: Fótbolti.net - Hafliði Breiðfjörð
Mynd: Fótbolti.net - Hafliði Breiðfjörð
Mynd: Fótbolti.net - Hafliði Breiðfjörð

Það voru gríðarlega óvænt úrslit sem litu dagsins ljós í Mjólkurbikar karla í dag þar sem Lengjudeildarlið Grindavíkur kíkti í heimsókn á Origo völlinn við Hlíðarenda.


Grindvíkingar heimsóttu Val og sýndu frábæra spilamennsku í sögulegum sigri þar sem varnarlínan steig varla feilskref.

Þeir tóku forystuna á 32. mínútu, þegar Viktor Guðberg Hauksson slapp innfyrir vörn heimamanna og skoraði framhjá Frederik Schram. Átta mínútum síðar tvöfaldaði Bjarki Aðalsteinsson forystuna eftir hornspyrnu.

Valsarar tóku völdin á vellinum í síðari hálfleik en áfram hélt varnarlína Grindvíkinga og voru það gestirnir sem bættu þriðja markinu við þvert gegn gangi leiksins. Þar var á ferðinni kempan Óskar Örn Hauksson sem skoraði mögulega fallegasta mark íslenska fótboltasumarsins.

Óskar Örn sýndi flotta takta til að leika á andstæðing á eigin vallarhelmingi áður en hann leit upp og sá að Frederik var kominn langt af marklínunni. Óskar gerði sér lítið fyrir og lét vaða úr miðjuhringnum svo boltinn endaði í netinu.

Tryggvi Hrafn Haraldsson minnkaði muninn fyrir Val undir lokin en það dugði ekki til. Sögulegur sigur Grindavíkur á Origo vellinum er staðreynd.

Lestu um leikinn

Valur 1 - 3 Grindavík
0-1 Viktor Guðberg Hauksson ('32)
0-2 Bjarki Aðalsteinsson ('40)
0-3 Óskar Örn Hauksson ('74)
1-3 Tryggvi Hrafn Haraldsson ('90)

Stjarnan rúllaði þá yfir Keflavík í efstudeildarslag þar sem sigur Garðbæinga virtist aldrei í hættu. Adolf Daði Birgisson kom Stjörnunni yfir eftir slæm mistök hjá Daníeli Gylfasyni snemma leiks og var aðeins eitt lið á vellinum.

Stjörnumenn tvöfölduðu forystuna þegar Ísak Andri Sigurgeirsson átti frábæra fyrirgjöf inn á teiginn sem Gunnlaugur Fannar Guðmundsson reyndi að bjarga. Það tókst ekki nógu vel, þar sem Gunnlaugur endaði á að tækla boltann í eigið net.

Eggert Aron Guðmundsson og Emil Atlason gerðu út um viðureignina með mörkum í seinni hálfleik og niðurstaðan sannfærandi fjögurra marka sigur.

Lestu um leikinn

Stjarnan 4 - 0 Keflavík 
1-0 Adolf Daði Birgisson ('16)
2-0 Gunnlaugur Fannar Guðmundsson ('40, sjálfsmark)
3-0 Eggert Aron Guðmundsson ('65)
4-0 Emil Atlason ('81)


Athugasemdir
banner
banner
banner
banner