Skandínavíska kærustuparið yfirgefur Chelsea (Staðfest)
Mynd: Getty Images
Mynd: Getty Images
Það verða breytingar á kvennaliði Chelsea í sumar þar sem tveir lykilmenn munu yfirgefa félagið.
Umræddir leikmenn eru Pernille Harder og Magdalena Eriksson, landsliðskonur Danmerkur og Svíþjóðar, sem hafa átt í ástarsambandi í rétt tæpan áratug.
Þær munu ganga í raðir Íslendingaliðs FC Bayern þar sem Glódís Perla Viggósdóttir, Karólína Lea Vilhjálmsdóttir og Cecilía Rán Rúnarsdóttir eru allar með samning við stórveldið.
Harder var á sínum tíma dýrasta fótboltakona heims þegar Chelsea keypti hana frá Wolfsburg í september 2020. Hún hefur skorað 44 mörk í 79 leikjum fyrir Chelsea en verið mikið meidd á yfirstandandi tímabili.
Chelsea vann FA bikarinn á dögunum og er á góðri leið með að tryggja sér Englandsmeistaratitilinn.
Eriksson hefur spilað yfir 100 leiki frá komu sinni til Chelsea 2017.
