England: Arsenal fór létt með Brentford

Arsenal er komið aftur á sigurbraut eftir tap gegn Manchester United í síðustu umferð.

Lærisveinar Mikel Arteta höfðu unnið alla leiki tímabilsins fyrir ferðina á Old Trafford og eru þeir núna búnir að endurheimta toppsætið af Englandsmeisturum Manchester City og erkifjendum sínum Tottenham. Man City og Spurs eru einu stigi á eftir Arsenal, sem er komið með 18 stig eftir 7 umferðir.

Arsenal heimsótti Brentford í grannaslag í dag og sýndi mikla yfirburði og yfirvegun í sigri sínum. William Saliba skoraði með skalla eftir hornspyrnu á sautjándu mínútu og tvöfaldaði Gabriel Jesus forystuna með öðrum skalla eftir magnaða sendingu frá Granit Xhaka sem fór í boga yfir vörnina.

Í upphafi síðari hálfleiks innsiglaði Fabio Vieira sigurinn með glæsilegu skoti utan teigs sem fór í stöngina og inn.

Sigur Arsenal virtist aldrei í hættu og augljóst að hugmyndafræði Arteta er byrjuð að skila sér.