England: Misstu niður þriggja marka forystu gegn Arsenal

West Ham United og Arsenal áttust við í Lundúnaslag og úr varð hin mesta skemmtun.

Hamrarnir byrjuðu af krafti og var Jesse Lingard, sem hefur farið feykilega vel af stað hjá sínu nýja félagi, búinn að skora fyrsta markið eftir stundarfjórðung. Hann tók þá vel á móti sendingu og kláraði með frábæru skoti í fjærhornið.

Skömmu síðar fengu Hamrarnir aukaspyrnu á hættulegum stað en í stað þess að skjóta tóku þeir spyrnuna fljótt á meðan vörn Arsenal var sofandi að hugsa um að stilla í varnarvegg. Boltinn barst til Jarrod Bowen sem kláraði vel úr þröngu færi.

Veislan var þó hvergi nærri búin því Tomas Soucek setti þriðja mark West Ham og virtist gera út um leikinn á 32. mínútu. Sex mínútum síðar skoraði Soucek aftur, nema í vitlaust mark í þetta skiptið. Hann fór fyrir skot Alexandre Lacazette og fór boltinn af Soucek og í netið.

Arsenal skipti um gír í síðari hálfleik en bæði lið héldu áfram að skapa sér færi. Gestunum tókst að minnka muninn á 61. mínútu með öðru sjálfsmarki, í þetta sinn var það Craig Dawson sem skoraði. Markið var nokkuð laglegt þar sem Dawson skoraði eftir fasta fyrirgjöf.

Mikil spenna var á lokakaflanum og náði Lacazette að gera jöfnunarmark á 82. mínútu eftir góða fyrirgjöf frá Nicolas Pepe.

Bæði lið reyndu að krækja í sigurmarkið en það hafðist ekki og urðu lokatölur 3-3 eftir stórskemmtilegan fótboltaleik.