Nýliðar Víkingar byrjuðu af krafti en þær unnu 1-2 sigur gegn Stjörnunni í Garðabæ. Sigurborg Katla Sveinbjörnsdóttir, markvörður Víkings, mætir af krafti inn í deildina og það gerir hin bráðefnilega Sigdís Eva Bárðardóttir einnig. Tveir leikmenn sem verður ótrúlega gaman að fylgjast með í sumar.

John Andrews, þjálfari Víkings, er þá þjálfari fyrstu umferðarinnar eftir þennan flotta sigur.

Nik Chamberlain tók þá einnig sigur í sínum fyrsta leik með Breiðablik, 3-0 gegn Keflavík. Vigdís Lilja Kristjánsdóttir var best þar og Agla María Albertsdóttir skilaði einnig flottri frammistöðu.

FH, sem spáð er góðu gengi í sumar, gerði góða ferð á Sauðárkrók og vann þar 0-1 sigur. Hildigunnur Ýr Benediktsdóttir skoraði sigurmarkið og átti Elísa Bríet Björnsdóttir góðan leik fyrir Tindastól en hún er með efnilegri leikmönnum deildarinnar.

Það eru þrír leikmenn úr síðasta verkefni hjá U19 landsliðinu í þessu úrvalsliði; Sigurborg Katla, Sigdís Eva og Vigdís Lilja. Svo er Elísa Bríet fædd árið 2008 og á bara eflaust eftir að fá sitt tækifæri með U19 landsliðinu á næstu árum. Margir spennandi leikmenn að koma upp í þessari deild.

Þá voru Caroline Murray og Eva Rut Ásþórsdóttir bestar í jafntefli Fylkis gegn Þrótti í Árbænum. Caroline leikur með Þrótti og Eva með Fylki.

Úrslit umferðarinnar:
Valur 3 - 1 Þór/KA
Tindastóll 0 - 1 FH
Breiðablik 3 - 0 Keflavík
Stjarnan 1 - 2 Víkingur R.
Fylkir 1 - 1 Þróttur R.