England: Arsenal fór illa með Newcastle

Arsenal fór ansi illa með Newcastle á Emirates í kvöld.

Newcastle kom ekki skoti að marki í fyrri hálfleik og Sven Botman varð fyrir því óláni að skora sjálfsmark og koma Arsenal í forystu.

Loris Karius var í marki Newcastle vegna veikinda Martin Dubravka en hann varði skalla frá Gabriel en boltinn fór í Botman og í netið. Stuttu síðar bætti Kai Havertz við öðru markinu.

Bukayo Saka bætti þriðja markinu við áður en Jakub Kiwior negldi síðasta naglann í kistu Newcastle með skalla eftir hornspyrnu en ekkert lið hefur skorað jafn mörg mörk úr föstum leikatriðum eins og Arsenal á tímabilinu.

Leikmenn Arsenal slökuðu á undir lok leiksins og Joe Willock sem var að spila sinn fyrsta leik síðan í byrjun nóvember tókst að klóra í bakkann en nær komust þeir ekki.

Þetta var sjötti deildarsigur Arsenal í röð.