„Mér líður ágætlega með þetta. Fínt að koma hérna og fá eitt stig.“ sagði Rúnar Páll Sigmundsson, þjálfari Fylkis, eftir 2-2 jafntefli liðsins við KR.
Lestu um leikinn: KR 2 - 2 Fylkir
Fylkismenn lentu tvisvar undir í dag en komu í bæði skiptin til baka. Rúnar er gífurlega ánægður með karakterinn í liðinu.
„Ég er gríðalega ánægður með karakterinn að jafna þetta. Við spiluðum fínasta leik. Við vorum passívir og spiluðum vörnina ágætlega en fáum samt tvö mjög ódýr mörk á okkur að mínu viti. Eins og kannski bara öll mörk sem við fáum á okkur eru. En við héldum ró okkar og nýttum þau færi sem við fengum. Heilt yfir hefði ég viljað vinna en tiltölulega sáttur við þetta stig.“
Fyrri umferðin spilaðis ekki vel stigalega séð fyrir Fylki en þeir eru staðráðnir í að safna fleiri stigum í seinni umferðinni.
„Fyrri umferðin spilaðist þannig að við fengum sjö stig. Ég er mjög ósáttur með það. Við erum allir mjög ósáttir með það. Frammistaðan hefur verið mjög góð í seinustu leikjum. Við þurfum að byggja ofan á það og gera betur í seinni umferðinni. Það er enginn sem gerir þetta fyrir okkur.“
Rúnar segir að það sé gír í Fylkismönnum fyrir komandi átök í Bestu deildinni.
„Mér líst vel á framhaldið. Gífurlega spennandi sumar og haust framundan. Það er gír í okkur. Góð stemning í hópnum. Við erum tilbúnir í þennan slag.“
Ómar Björn kom inn á í seinni hálfleik og lagði upp seinna mark Fylkis en Rúnar er gífurlega ánægður með mennina sem komu inn í leikinn í dag.
„Ég er gífurlega ánægður með þá. Sama með seinustu leiki. Varamennirnir hafa komið mjög vel inn í þetta og breytt gangi leiksins. Þannig á þetta að vera.“ sagði Rúnar Páll að lokum
Viðtalið við Rúnar má sjá í heild sinni í spilaranum hér að ofan.
