Þjálfarar Leiknis, Freyr Alexandersson og Davíð Snorri Jónasson.
Leiknir vann 2-0 sigur gegn Víkingi Ólafsvík í stórleik í 1. deildinni í dag. Sindri Björnsson og Matt Horth skoruðu mörkin.
Lestu um leikinn: Leiknir R. 2 - 0 Víkingur Ó.
„Mér fannst við betri í leiknum og stigin þrjú mjög góð. Það er alltaf mjög erfitt að spila við Ólafsvík," sagði Freyr Alexandersson, annar af þjálfurum Leiknis.
„Við vorum skipulagðir og gerðum það sem var lagt upp með. Vorum að skapa okkur færi en nýtingin á færunum var ekki góð og eitthvað sem maður var farinn að hafa áhyggjur af."
Sindri Björnsson, 19 ára miðjumaður Leiknis, hefur stigið vel upp í sumar og skorað grimmt.
„Hann er búinn að standa sig hrikalega vel. Við töluðum um það fyrir tímabilið að ef hann ætlar að taka næsta skref á sínum ferli verður hann að gera eitthvað í sumar. Hann hefur byrjað þetta mót vel og nú er pressa á honum að gera þetta áfram eins og maður," sagði Freyr en viðtalið má sjá í heild sinni í sjónvarpinu hér að ofan.
