Þungu fargi var létt af Árna Frey Guðnasyni og lærisveinum hans í Fylki er liðið sigraði Völsung, 4-1, í 10. umferð Lengjudeildarinnar á PCC-vellinum á Húsavík í dag.

Fylkismenn höfðu ekki unnið deildarleik síðan í 2. umferðinni gegn Selfyssingum. Róðurinn hefur verið þungur en Árni Freyr sagðist á dögunum hafa trú á því að hann og teymi hans gæti snúið genginu við og fékk hann traustið til þess.

Pablo Aguilera Simon braut ísinn fyrir Fylki á 21. mínútu er Emil Ásmundsson átti skot eða hálfgerða sendingu á fjær sem Pablo mætti og stýrði í netið.

Emil kom sér á blað fjórum mínútum síðar með langskoti sem Ívar Arnbro Þórhalsson var í mestu vandræðum með og missti aftur fyrir sig og í netið.

Gestirnir fóru með tveggja marka forystu inn í hálfleikinn, en þegar um það bil fimmtán mínútur voru búnar af síðari minnkaði Inigo Arruti muninn eftir hornspyrnu.

Fylkismenn voru harðákveðnir í því að sækja öll þrjú stigin í dag og þegar tuttugu mínútur voru til leiksloka bætti Guðmar Gauti Sævarsson við þriðja markinu. Theodór Ingi Óskarsson fékk mikinn tíma til að athafna sig á hægri vængnum, kom boltanum inn á markteiginn á Guðmar og eftirleikurinn auðveldur.

Seint í uppbótartíma gerði Eyþór Aron Wöhler endanlega út um leikinn.

Nikulás Val Gunnarsson var yfirvegaður með boltann, sendi Theodór í gegn sem lagði hann síðan til hliðar á Eyþór sem gulltryggði sigur Fylkis.

Langþráður var hann og annar sigur Fylkis kominn í hús. Liðið fer upp í 9. sæti með 10 stig en Völsungur er í 6. sæti með 13 stig.