Margrét Lára gefur út ævisögu sína
Margrét Lára og Sif Atladóttir eftir síðasta landsleik Margrétar en hún skoraði auðvitað mark í þeim leik.
MLV9, ævisaga Margrétar Láru.
Margrét Lára lék lengi með Val.
Er langmarkahæsta landsliðskona sögunnar.
Margrét með systur sinni, Elísu Viðarsdóttur.
Það var toppurinn að spila með íslenska landsliðinu á stórmóti.
Núna styttist í það að íslenska landsliðið hefji leik á EM í Sviss.
Margrét Lára Viðarsdóttir, ein mesta fótboltagoðsögn í sögu Íslands, var að gefa út ævisögu sína en í bókinni segir Margrét Lára sögu sína og deilir reynslu sinni. Hún gerir ferilinn upp og segir á einlægan hátt frá sigrunum og mótlætinu, en hægt er að nálgast bókina í öllum helstu bókabúðum.
Margrét Lára er langmarkahæsti leikmaður í sögu íslenska landsliðsins og spilaði á sínum tíma fyrir það sem var þá besta félagslið Evrópu, Turbine Potsdam í Þýskalandi.
Margrét Lára er langmarkahæsti leikmaður í sögu íslenska landsliðsins og spilaði á sínum tíma fyrir það sem var þá besta félagslið Evrópu, Turbine Potsdam í Þýskalandi.
En hvað varð til þess að hún ákvað að setja sína sögu niður á prent?
„Það eru nokkrar ástæður," segir Margrét Lára við Fótbolta.net.
„Fyrst og fremst langaði mig að skrifa mína sögu. Mig langaði að gefa frá mér og mögulega verða hvatning fyrir ungt íþróttafólk eða hvern sem langar að stefna hátt og ná árangri í lífinu. Bókin er sagan mín frá því ég er fimm ára að spila í Vestmannaeyjum með Tý þangað til ég er orðin atvinnukona í fótbolta og svo þegar ferlinum lýkur. Það hafa kannski ekki margar konur skrifað svona bók. Sara Björk er auðvitað búin að gera það en þær eru ekkert rosalega margar sem hafa gert það. Fyrir mitt leyti eru þetta líka þær bækur sem ég gríp yfirleitt í þegar ég fér í bókabúð, það eru ævisögur og sérstaklega íþróttaævisögur."
„Við erum alltaf að tala lestur ungs fólks á Íslandi og að við þurfum að örva það. Mér fannst það hvetjandi að henda þessari bók fram því þetta getur kannski aukið smá á það að fá fólk til að lesa meira. Þetta er bók sem hefði höfðað til mín hvort sem það var þegar ég var tólf ára, sjö ára, þrítug eða fertug. Ég veit ekki hvort sagan mín sé áhugaverðari en einhver önnur en ég fór frá því að vera ung Eyjastelpa að spila fótbolta með strákum í Vestmannaeyjum í það að spila með besta félagsliði í Evrópu og fara á stórmót með Íslandi. Það er líka gaman að lesa um það hvað tímarnir í íþróttum hafa breyst á stuttum tíma og sérstaklega í kvennaíþróttum," segir markadrottningin.
Sagan var skrifuð
Margrét Lára segir að það hafi gengið vel að safna efni fyrir bókina, en sagan hafi eiginlega verið skrifuð áður en vinnan hófst.
„Þetta gekk bara nokkuð vel. Ég er ekki fædd árið 1912 en samfélagsmiðlar og umfjöllun hefur náttúrulega aukist gríðarlega á síðustu árum. Það verður trúlega auðveldara fyrir einstakling sem ætlar að skrifa svona sögu eftir nokkur ár að finna heimildir. Þetta var smá vinna," segir Margrét.
„En amma mín heitin, hún Margrét Sigurjónsdóttir, hélt úti svona úrklippubókum. Hún klippti út allar blaðagreinar sem komu um mig á mínum ferli. Í raun og veru var þessi saga löngu skrifuð áður en við byrjuðum að skrifa hana. Við fórum bara í úrklippubækurnar hennar ömmu og gátum þrætt söguna frá því ég var lítil stelpa. Vissulega var þetta mikil vinna en bókin er mjög myndskreytt af bæði mjög flottum myndum og þessum úrklippum. Ég skrifaði líka dagbækur á meðan mínum ferli stóð. Ég vissi alltaf að ég myndi skrifa svona sögu, var löngu búin að ákveða það og undirbúa áður en hún varð raunveruleg. Ég þurfti að finna stað og stund, og finna einhvern frábær meðhöfund sem er Bjarni Helgason. Þetta hefur verið að smella síðastliðið eitt og hálft ár."
Hún segist hafa gengið í gegnum ákveðinn tilfinningarússíbana á meðan bókin var skrifuð.
„Ég berskjalda mig alveg í bókinni, fer og ræði mína erfiðu tíma. Ferillinn minn er farsæll en ég lendi líka í mjög erfiðum meiðslum og var lengi að ströggla við mikið álag og slíkt. Það var mjög erfiður tími. Maður fór alveg í gegnum allar tilfinningarússíbanann og það kom mér mest á óvart hvað maður náði að fara aftur inn í svona gamalt sem ég hélt að ég væri búin að vinna úr. Það var erfitt að rifja upp ákveðna tíma," segir hún.
Getur höfðað til allra
Margrét Lára telur að sagan geti höfðað til allra, ungra sem aldna.
„Ég myndi segja að þessi bók höfði til allra. Ég held að við getum öll speglað okkur í því sem ég gekk í gegnum á sínum tíma, bæði góðu hlutina og slæmu hlutina. Bókin er tiltölulega auðlesin og þægileg upp á það að gera að unga fólkið okkar getur lesið hana. Ég veit það líka að þeir sem eldri eru geta haft gaman að henni líka. Við lítum allavega svo á að markhópurinn spannar frekar breitt aldursbil," segir Margrét en það má svo sannarlega segja að unga fólkið geti haft gaman að því að lesa um sögu Margrétar og þá kannski sérstaklega ungar fótboltastelpur sem eru núna komnar með stórar fyrirmyndir sem mikið er fjallað um.
„Við erum bara að sjá það að í dag er það eftirsóknarvert að vera farsæl fótboltakona. Það eru fimm, sex ára stelpur sem segja það upphátt í dag að þeim langar að verða atvinnukonur í fótbolta. Það voru ekki orð sem stelpur af minni kynslóð sögðu. Þær kannski hugsuðu það og áttu sér drauma um það, en þær létu það ekki út úr sér þar sem þær höfðu ekki fyrirmyndir í því. Auðvitað vitum við það alveg að konur spiluðu í útlöndum og gerðu það á undan mér, en fréttaflutningurinn um það eða að horfa á landsleik í sjónvarpi var eitthvað sem var mjög fátítt. Við erum að sjá það í dag að fyrirmyndir eru sjáanlegar sem er bara frábært," segir Margrét Lára.
„Ungar stelpur geta átt sér sömu drauma og ungu strákarnir. Maður er svo þakklátur fyrir þessa breytingu í kvennaíþróttum almennt en við erum líka að sjá þetta í atvinnulífinu að konur eru farnar að stjórna stórum fyrirtækjum."
Toppurinn að spila á stórmóti
Núna styttist í það að Evrópumótið í Sviss fari af stað og þar er Ísland á meðal þátttökuþjóða. Margrét Lára upplifði það að spila tvisvar með Íslandi á stórmóti en hún fór á EM 2009 og svo á EM 2013. Hún rétt missti af EM 2017 vegna meiðsla.
„Að spila á stórmóti er draumur hvers íþróttamanns," segir Margrét Lára. „Einstaklingsíþróttamennirnir stefna á Ólympíuleika og þetta er það sem hópíþróttafólkið stefnir að; það er að fara á HM eða EM. Það var klárlega toppurinn á mínum ferli að spila þessar lokakeppnir."
„Ég fékk líka að finna fyrir því að missa af EM þar sem ég slít krossband þremur vikum fyrir EM 2017. Maður veit alveg hvað leikmenn sem eru að fara á EM eru að upplifa núna en það eru alltaf líka þær sem sitja eftir heima með sárt ennið, og maður getur líka fundið til með þeim. Þetta er það sem allir bíða eftir og er bara fjögurra ára fresti. Þú nærð mögulega fjórum ef þú byrjar ung og ert heppin. Þetta er klárlega toppurinn. Maður finnur það að þjóðin er að hitna og við bíðum spennt."
Henni líst vel á möguleika Íslands fyrir komandi Evrópumót þar sem Ísland er í riðli með Finnlandi, Sviss og Noregi.
„Mér líst vel á möguleika Íslands. Mér finnst þessi riðill líta vel út á pappír en auðvitað erum við með heimakonum í Sviss í riðli og Noregi sem er með feykilega gott lið. Þessi riðill er alls ekki auðveldur en hann hafði getað verið flóknari. Hingað til höfum við svolítið lent í þessum dauðariðlum. Fyrirfram finnst mér við vera núna í riðli sem við getum gert eitthvað í. Það þarf allt að smella, þurfum að vera með þéttan varnarleik og skora mörk. Svo þurfa hlutirnir að detta fyrir okkur. Það þarf allt að smella svo við förum upp úr riðlinum en ég er bjartsýn á að það takist."
En vantar íslenska liðinu ekki eina Margréti Láru?
„Ég veit það nú ekki. Við höfum alveg rætt það við sem höfum verið að fjalla um liðið og kvennaboltann að auðvitað söknum við dæmigerðrar níu. En það virðist ekki bara vera vandamál okkar á Íslandi, það virðist vera alþjóðlegt svolítið að það er erfiðara að finna afgerandi níu í dag."
„Við erum samt alveg með leikmenn sem geta skorað mörk og það eru mörk í mjög mörgum af þessum stelpum. Við þurfum að nýta færin okkar og heppnin þarf svolítið að vera með okkur. Við þurfum að hafa sjálfstraust upp við markið, það er lykillinn að þessu," sagði þessi magnaða íþróttakona að lokum.
Margrét Lára spilaði alls 124 landsleiki og skoraði hún í þeim 79 mörk.
Athugasemdir
