KA tapaði stórt gegn Val í kvöld. Fótbolti.net ræddi við Hallgrím Jónasson, þjálfara KA, eftir leikinn.
Lestu um leikinn: KA 2 - 5 Valur
„Töpum sanngjarnt fyrir Val í dag. Fyrri hálfleikurinn slær út af laginu, byrjum á því að gefa mark og svo er sjálfsmark eftir horn. Mér fannst við ekki líkir sjálfum okkur eftir það. Svo fáum við líflínu, skorum flott mark og erum 2-1 undir sem var ekkert voðalega sanngjarnt, við hefðum getað fengið á okkur fjögur mörk í fyrri hálfleik," sagði Haddi.
„Það var síðan fínn kraftur í okkur, vorum að pressa, Frederik ver glæsilega frá Jóan sem dæmi. Mér fannst við flottir á þeim kafla en það var ekki nóg."
KA mætir KR í botnslag í næstu umferð.
„Við þurfum að fara vinna fótboltaleiki. Það hafa verið mjög flottar frammistöður síðustu sex leiki en frammistaðan í dag ekki nógu góð. VIð þurfum að sleikja sárin í kvöld og svo þurfum við að sýna úr hverju við erum gerðir. Við þurfum að fá miklu betri frammistöðu en þetta ef við ætlum að fá eitthvað út úr leiknum gegn KR," sagði Haddi.
