„Það fer svolítið mikið frá okkur í 1-3," sagði Aðalsteinn Jóhann Friðriksson, þjálfari Völsungs, við Fótbolta.net eftir tap gegn Fylki á heimavelli í dag.
Lestu um leikinn: Völsungur 1 - 4 Fylkir
„Fyrri hálfleikurinn er að mörgu leyti vel spilaður af okkar hálfu. 2-0 markið eru einstaklingsmistök sem bara gerast, það er bara partur af þessu. Við ræddum saman í hálfleik og komum vel stemmdir inn í seinni hálfleik; náðum í markið til að gera þetta að leik. Það kom eðlilega smá skjálfti í Fylkisliðið. Þess vegna erum við mjög svekktir með hvernig við fengum á okkur þriðja markið, það var óþarfi, því augnablikið var með okkur."
„Ég ætla ekki að henda neinum undir rútuna eða neitt svoleiðis, þetta er ákvörðunartaka hvernig við erum að velja og hvernig við töpum boltanum. Þeir komast í of mikla yfirtölu af því við vorum að búa til yfirtölu annars staðar á vellinum."
Alli Jói hefur ekki stórar áhyggjur af liðinu þrátt fyrir tapið. „Að mörgu leyti góð frammistaða hjá liðinu. Mörkin aðeins auðveld og við þurfum að skoða það, en heilt yfir er leikurinn vel spilaður. Ég ætla ekki að hafa stórar áhyggjur, en ég er svekktur með þessi úrslit, þau eru ljót."
Þjálfarinn var ánægður með umgjörðina, en hann er í þessum skrifuðu orðum á hliðarlínunni að stýra kvennaliði Völsungs sem er að spila við ÍH. Hann ræðir um stóra Völsungsdaginn og þjálfarastarfið í viðtalinu sem má nálgast í spilaranum efst.
Athugasemdir
