Helgi Valur Daníelsson, miðjumaður Fylkis, meiddist mjög illa í 2-0 sigri liðsins á Gróttu í Pepsi Max-deildinni í gær. Líklegt er að þetta hafi verið síðasti leikur Helga Vals á ferlinum.
„Ég er fjórbrotinn, semsagt tvöfalt brot á báðum beinum og alveg í sundur. Ég er samt sem áður furðugóður miðað við allt saman og vil núna bara drífa þessa aðgerð af og klára þetta," sagði Helgi Valur við mbl.is í dag.
Helgi Valur verður 39 ár gamall í næsta mánuði og reiknar með að skórnir séu á leið upp á hillu.
„Það er miklar líkur á því að þetta hafi verið síðasti leikurinn já. Ég er ekki að svekkja mig of mikið á þessu núna. Ég hef sloppið vel frá meiðslum yfir ferilinn þannig að kannski átti maður þetta bara hálfpartinn inni,“ bætti Helgi Valur léttur við í samtali við mbl.is.
Helgi Valur á langan feril að baki en hann spilaði erlendis með Peterborough United, Öster, Elfsborg, Hansa Rostock, AIK, Belenenses og AGF áður en hann hætti í fótbolta árið 2015. Helgi Valur tók skóna aftur af hillunni árið 2018 og var að byrja þriðja tímabilið í röð með uppeldisfélagi sínu Fylki. Helgi Valur spilaði einnig 33 landsleiki með íslenska landsliðinu á ferli sínum.
Helgi er þriðji reyndi leikmaðurinn í Pepsi Max-deildinni sem meiðist alvarlega á síðustu viku en Hallgrímur Jónasson, varnarmaður KA, og Gunnar Þór Gunnarsson, varnarmaður KR, slitu báðir krossband í síðustu viku.
Athugasemdir