Sheffield United, spútniklið ensku úrvalsdeildarinnar, hefur styrkt sig enn frekar á þessum gluggadegi. Gríski varnarmaðurinn Panagiotis Retsos var að skrifa undir hjá félaginu á láni út tímabilið.
Retsos kemur frá Bayer Leverkusen í Þýskalandi. Hann er 21 árs gamall.
Hann hefur á þessu tímabili komið við sögu í sex leikjum hjá Bayer Leverkusen í öllum keppnum. Meiðsli hafa verið að stríða honum.
Chris Wilder, stjóri Sheffield United, talaði um það í gær að hann vildi landa þremur leikmönnum áður en félagaskiptaglugginn lokaði. Honum tókst að fá þá þrjá leikmenn; Retsos, Sander Berge og Richairo Zivkovic.
Sheffield United er í áttunda sæti ensku úrvalsdeildarinnar.
Athugasemdir
