Guðmunda Óladóttir leikmaður Selfoss var að vonum hæstánægð eftir að liðið tryggði sér sæti í efstu deild kvenna að ári með góðum 6-1 sigri gegn Keflavík.
„Mér líður bara rosalega vel. Þetta er eiginlega ástæðan af hverju maður er í fótbolta, það eru þessir leikir,“ sagði Guðmunda við Fótbolta.net.
Guðmunda segir að góður stuðningur áhorfenda hafi hjálpað þeim til sigurs í þessum leik í kvöld.
„Við fundum fyrir því í Tindastóls leiknum að þá fengum við stúkuna með okkur og það hjálpaði okkur rosalega. Við auglýstum þennan leik mjög vel þannig að það var mjög gott að hafa stúkuna með.“
Selfoss tapaði fyrri leiknum í Keflavík með einu marki en þær voru mun betri í þessum leik. Guðmunda telur að of mikið stress hafi verið í liðinu í fyrri leiknum.
„Við mættum bara illa stemmdar í leikinn, við vorum kannski stressaðar og ég held að það hafi verið okkur að falli. Við vorum að klúðra sendingum á miðjunni og vorum ekki mættar í þann leik.“
