Landsliðsmaðurinn Jón Guðni Fjóluson verður mögulega seldur frá rússneska félaginu Krasnodar eftir áramót.
Jón Guðni virðist ekki inni í framtíðarplönum Krasnodar og er talið nokkuð líklegt að hann verði settur á sölulista í byrjun næsta árs, ef marka má frétt frá Championat, sem er einn stærsti íþróttamiðilinn í Rússlandi. Íslendingavaktin segir frá þessu í dag.
Krasnodar er í 4. sæti í rússnesku úrvalsdeildinni en félagið ætlar að setja fjóra leikmenn á sölulista og Jón Guðni er einn þeirra.
Hinn þrítugi Jón Guðni kom til Krasnodar frá Norrköping sumarið 2018. Síðan þá hefur hann spilað 25 leiki í öllum keppnum en verið ónotaður varamaður í 41 leik.
Jón Guðni er í íslenska landsliðshópnum fyrir komandi leiki Íslands gegn Tyrklandi og Moldóvu en hann var í byrjunarliðinu í síðasta leik gegn Andorra.
Athugasemdir
