FH - KR í úrslitum VISA-bikarsins klukkan 18:00 á morgun
,,Við ætlum að vinna þennan titil eins og fyrir tveimur árum og stefnan er sett á það," sagði Bjarni Guðjónsson fyrirliði KR við Fótbolta.net en liðið mætir FH í úrslitum VISA-bikarsins klukkan 18:00 á Laugardalsvelli á morgun.
,,Við erum fullir af sjálfstrausti. Okkur hefur gengið vel í undanförnum leikjum, náð að skora svolítið af mörkum og fengið lítið á okkur. Við erum á fínu róli og fullir tilhlökkunar að koma inn í þennan leik."
,,Ég ætla að vona að það verði góð mæting. Ég veit að KR-ingar ætla að fjölmenna og ég hugsa að FH-ingar geri það sama," sagði Bjarni en jafnvel er búist við að áhorfendamet verði sett í þessum bikarúrslitaleik.
,,Það væri mjög gaman ef það myndi gerast og það er ekkert sem mælir á móti því að svo verði. Svo hefur maður hitt fullt af fólki sem er hvorki FH-ingar né KR-ingar sem ætla að mæta á völlinn af því að það eru tvö flott lið að spila á skemmtilegum degi um sumar á Íslandi."
Hér að ofan má sjá viðtalið í heild sinni.
Útvarpsþátturinn Fótbolti.net verður með upphitunarþátt fyrir bikarúrslitaleikinn milli 12 og 14 á laugardag. Egill Helgason, Friðrik Dór Jónsson, Gunnar Kristjánsson og Hjörvar Hafliðason verða á meðal gesta.
