Kompany: Bæði lið munu leggja allt í sölurnar í vetur

Burnley heimsótti Luton Town í nýliðaslag og skóp nauman en afar dýrmætan sigur. Lærisveinar Kompany eru með fjögur stig eftir sjö umferðir þökk sé glæsilegu sigurmarki í boði Jacob Bruun Larsen.

„Við þurftum að berjast allt til enda fyrir þessum sigri og ég er stoltur af strákunum fyrir baráttuna sem þeir sýndu í dag. Það er frábær tilfinning að ná í þrjú stig í ensku úrvalsdeildinni," sagði Kompany að leikslokum, en þetta var hans fyrsti sigur sem þjálfari í úrvalsdeildinni.

„Þetta var góður leikur þar sem tvö vinnusöm lið mættust. Bæði lið sýndu að þau munu leggja allt í sölurnar til að standa sig vel á þessari leiktíð."

Burnley er enn í fallsæti þrátt fyrir sigurinn, en þar dúsa Sheffield United og Bournemouth einnig sem eru einu úrvalsdeildarliðin enn án sigurs á tímabilinu.