Það fóru þrír leikir fram í sænska kvennabikarnum í dag þar sem Hlín Eiríksdóttir var í byrjunarliði Kristianstad sem lagði Linköping að velli.
Hlín átti stóran þátt í sigrinum þar sem hún jafnaði fyrir Kristianstad eftir að Íslendingaliðið hafði lent undir. Hlín skoraði á 69. mínútu og gerði Evelyne Viens sigurmarkið skömmu fyrir lok venjulegs leiktíma.
Amanda Jacobsen Andradóttir kom inn af bekknum á 81. mínútu á meðan Delaney Baie Pridham, fyrrum framherji ÍBV, kom inn á 75. mínútu í liði heimakvenna í Linköping.
Guðrún Arnardóttir var þá ónotaður varamaður í stórsigri Rosengård gegn Alingsås. Kristianstad er svo gott sem búið að tryggja sér toppsæti riðilsins í bikarnum eftir sigra gegn Rosengård og Linköping. Lærlingum Elísabetar Gunnarsdóttur nægir jafntefli í lokaumferðinni gegn botnliði Alingsås til að tryggja sér toppsætið.
Að lokum steinlá Uppsala, sem Andrea Celeste Thorisson er á mála hjá, á heimavelli gegn Hammarby.
Linköping 1 - 2 Kristianstad
1-0 C. Tandberg ('16)
1-1 Hlín Eiríksdóttir ('69)
1-2 Evelyne Viens ('86)
Alingsås 0 - 4 Rosengård
Uppsala 0 - 4 Hammarby
Heiðdís Lillýardóttir lék þá allan leikinn í liði Basel sem gerði jafntefli á útivelli gegn Yverdon í svissnesku deildinni. Basel er þar um miðja deild með 17 stig eftir 12 umferðir.
Að lokum var Berglind Rós Ágústsdóttir ónotaður varamaður í svekkjandi tapi Huelva gegn Athletic Bilbao í efstu deild á Spáni. Huelva komst í tveggja marka forystu snemma leiks en gestirnir úr Baskalandi unnu að lokum 2-3.
Huelva er með 17 stig eftir 20 umferðir, þremur stigum fyrir ofan fallsvæðið. Þetta var sjöunda tap liðsins í röð í öllum keppnum.
Yverdon 1 - 1 Basel
Huelva 2 - 3 Athletic Bilbao
