Rifja upp Gylfaborðann á Hlíðarenda - „Fann lyktina af titli og steig upp“
Stuðningsmenn Vals voru með skýr skilaboð.
Mynd: Fótbolti.net - Hafliði Breiðfjörð
Gylfi vann sinn fyrsta titil á ferlinum í gær.
Mynd: Fótbolti.net - Hafliði Breiðfjörð
Stuðningsmenn Vals voru með skýr skilaboð.
Mynd: Fótbolti.net - Hafliði Breiðfjörð
Gylfi Þór Sigurðsson vann sinn fyrsta titil á ferlinum í gærkvöld er Víkingur tryggði sér Íslandsmeistaratitilinn. Gylfi gekk til liðs við Víking frá Val skömmu fyrir tímabil við mikið fjölmiðlafár.
Tímabilið byrjaði illa og Gylfi fékk sinn skerf af gagnrýni í upphafi tímabils. Stuðningsmenn Vals mættu til að mynda með borða tileinkaðan Gylfa sem á stóð: „Enginn skilaréttur!“ Undanfarna mánuði hefur Gylfi fundið taktinn og þegar mest á reyndi hefur hann verið einn besti leikmaður Víkings.
Mestu vonbrigði tímabilsins - Gylfi á báðum listum
„Gylfi Þór Sigurðsson var frábær í þessum leik gegn FH. Hann er einn af þessum leikmönnum sem hefur stigið þvílíkt upp undanfarið eftir rólega byrjun,“ sagði Valur Gunnarsson, sérfræðingur Fótbolta.net, í Innkastinu í gær og Elvar Geir svaraði:
„Við munum eftir borðanum á Hlíðarenda, það er ýmislegt búið að gerast á tímabilinu. En Gylfi stígur upp nákvæmlega þegar kemur að úrslitastundu á tímabilinu.“
Sigurbjörn Hreiðarsson tók því næst til máls: „Það voru mikil hámæli í sumar um hitt og þetta. En Gylfi hefur verið frábær upp á síðkastið. Hann fann lyktina að þetta gat gerst og þá steig hann upp og fór upp á annað 'level'.“
„Það er gaman að því að besti landsliðsmaður allra tíma eigi núna Íslandsmeistaratitil, sem hann var svo sannarlega að sækjast eftir,“ sagði Valur að lokum.
Gylfi vann sinn fyrsta titil á ferlinum í gær.
Mynd: Fótbolti.net - Hafliði Breiðfjörð
