Arnar í viðtali við Gunnlaug Jónsson eftir leik á föstudag.
Arnar Gunnlaugsson, þjálfari Víkings, á ekki von á leikbanni vegna viðtals sem hann fór í við Stöð 2 Sport eftir stórleikinn gegn Breiðabliki síðasta föstudagskvöld.
Það var mikill hiti í Arnari eftir leikinn og lét hann Ívar Orra Kristjánsson, dómara leiksins, heyra það.
Hann var aðallega ósáttur við það að uppbótartíminn hefði verið lengri en gefið var upp, jafnvel þó svo að hann hefði bara farið 40 sekúndur fram yfir og það var annað mark fyrr í uppbótartímanum. Arnar var líka ósáttur við það hversu lítið Víkingarnir komust upp með.
Arnar sagði að Ívar hefði verið alveg ömurlegur og bætti við: „Ég er búinn að standa með þessum dómurum í ansi mörg ár en núna hef ég virkilegar áhyggjur... Maður reynir að tala við þessa gaura en þeir eru jafn heilagir og páfinn. Þeir þykjast svo ekkert vita og benda bara á hvorn annan."
Morgunblaðið ræddi við Klöru Bjartmarz, framkvæmdastjóra KSÍ, í dag en hún er með heimild til að vísa málum til aga- og úrskurðarnefndar. Hún á ekki von á því að vísa viðtali Arnars til aganefndar.
„Hann fór hörðum orðum yfir frammistöðu dómara, en það sem við höfum verið að miða við er að þú getur haft skoðun á frammistöðu dómara, sem í þessu tilviki var harkalega sett fram. En ef ummælin eru þess efnis að dómarinn er sakaður um óheiðarleika eða svindl, þá höfum við verið að senda það til nefndarinnar," sagði Klara og staðfesti að hún væri ekki búin að vísa viðtalinu til aganefndar.
Sjá einnig:
Logi og Sölvi fá einn leik í bann en Guðjón Pétur fær tvo
Athugasemdir
