"Ég er bara svekktur að hafa ekki unnið leikinn," sagði Úlfur Arnar Jökulsson, þjálfari Fjölnis, eftir 2-2 jafntefli gegn Gróttu í Lengjudeildinni í kvöld.
Lestu um leikinn: Fjölnir 2 - 2 Grótta
"Þetta var í fyrsta sinn í sumar sem við lentum undir og það gerðist tvisvar sinnum. Auðvitað var flott að koma til baka. Það var samt alger óþarfi að lenda undir í bæði skiptin fannst mér og þess vegna var ég svekktur að vinna ekki leikinn"
Hann var nokkuð ánægður með spilamennskuna.
"Við vorum fínir. Ekki eins góðir og við getum verið en mér fannst spilamennskan fín. Það er alltaf erfitt að spila við þetta Gróttulið. Ég er svekktur með að við töluðum um að þeir væru tveir sem þyrfti að dekka sérstaklega í föstum leikatriðum en samt byrjar þetta á því að Pétur skorar. Það var reyndar eftir svakalega dýfu í aðdragandanum. Það er galið að dómarinn hafi látið plata sig þarna. Þessi dýfa var algert grín."
Þá ræddum við um valið á U-19 landsliðinu fyrir lokakeppni EM "Júlíus Mar Júlíusson átti að vera þarna að mínu mati en ég ber virðingu fyrir vali landsliðsþjálfarans og segi áfram Ísland."
Halldór Snær Georgsson, markvörður Fjölnis, var valinn í U-19 landsliðið og lék svo sinn fyrsta deildarleik í sumar í kvöld. Hafði valið eitthvað með það að gera?
"Nei. Sigurjón var að taka sveinspróf í dag og það var krefjandi verkefni. Við gáfum honum fókus í það og við búum bara svo vel að eiga tvo frábæra markmenn."
Nánar er rætt við Úlf í spilaranum hér að ofan
