Ítalía: Tíu leikmenn Milan unnu Sampdoria - Leao rekinn af velli eftir misheppnaða bakfallsspyrnu

Milan er komið upp í 2. sæti Seríu A á Ítalíu eftir 2-1 baráttusigur á Sampdoria í kvöld. Milan spilaði manni færri nánast allan síðari hálfleikinn eftir misheppnaða hjólhestaspyrnu Rafael Leao.

Leao, sem var besti maður ítölsku deildarinnar á síðustu leiktíð, byrjaði leikinn vel. Hann lagði upp fyrsta mark leiksins fyrir Junior Messias á 6. mínútu leiksins.

Hann taldi sig hafa lagt upp annað mark á 21. mínútu er belgíski sóknarmaðurinn Charles De Ketelaere fékk boltann í öxlina og þaðan í netið eftir fyrirgjöf Leao. Markið var hins vegar dæmt af þar sem Olivier Giroud var í rangstöðu í aðdragandanum.

Milan var líklegt til að bæta við fleiri mörkum en á 47. mínútu í síðari hálfleik fékk Leao að líta sitt annað gula spjald. Hann reyndi bakfallsspyrnu inn í teig Sampdoria en sú spyrna misheppnaðist svakalega og hæfði hann Alex Ferrari, varnarmann Sampdoria, í staðinn. Fyrir það fékk hann sitt annað gula spjald og þar með rautt.

Well, that’s one way to get sent off.

A second yellow card for Rafael Leao after his attempted overhead kick goes wrong.

It now means he’ll miss Milan’s big showdown against Napoli.#SampdoriaMilan pic.twitter.com/Toc7ESJ80C

— Sacha Pisani (@Sachk0) September 10, 2022

Filip Djuricic jafnaði metin tíu mínútum síðar með skalla áður en Olivier Giroud gerði sigurmark Milan úr vítaspyrnu á 67. mínútu leiksins.

Mike Maignan, markvörður Milan, náði að bjarga liðinu í tvígang undir lokin frá Manolo Gabbiadini og lokatölur því 2-1 fyrir Milan sem er í öðru sæti með 14 stig, jafnmörg og Napoli.