Sigurður Heiðar Höskuldsson
Sigurður Heiðar Höskuldsson, þjálfari Leiknis, var vitanlega svekktur eftir 4-2 tapið fyrir FH í neðri hluta Bestu deildar karla á Kaplakrikavelli í dag en þetta þýðir að Leiknir er nú í fallsæti þegar þrír leikir eru eftir.
Lestu um leikinn: FH 4 - 2 Leiknir R.
FH komst í 2-0 á fyrstu 17 mínútum leiksins áður en Leiknismenn minnkuðu muninn.
Heimamenn fengu svo annan góðan kafla á lokakaflanum þar sem Matthías Vilhjálmsson skoraði tvö og gerði út um leikinn. Leiknir náði að klóra í bakkann, en lokatölur 4-2 og Leiknismenn í basli fyrir síðustu þrjá leikina.
„Við gefum þeim bara 2-0 í forgjöf. Við byrjum ekki leikinn og erum barnalegir en eftir það erum við miklu betri aðilinn og þeir eyddu mikilli orku í byrjun að pressa okkur og svekkjandi að fá ekkert út úr þessu. Tvö stangarskot og svo slökkvum við á okkur í fimm mínútur og þeir skora tvö mörk. Ógeðslega svekkjandi," sagði Sigurður við fjölmiðla í kvöld.
Leiknismenn fengu á sig víti á 16. mínútu er Gyrðir Hrafn Guðbrandsson var í baráttunni við Matthías en Sigurður segir þessa hluti hafa fallið á móti Leikni á þessu tímabili.
„Þetta var klafs og eitthvað en þessi móment eru að falla á móti okkur full mikið sem er svekkjandi líka. Maður þarf að hafa heppni með sér í þessu."
Leiknismenn gerðu taktískar breytingar eftir tuttugu mínútur og það virtist ganga upp.
„Menn þurftu að vakna og vera ekki að spila til baka. Við erum með meiddan markmann í markinu sem getur ekki sparkað og vorum alltaf að spila til baka á hann. Spiluðum þetta gjörsamlega upp í hendurnar á þeim sem var svekkjandi en við löguðum þetta og tókum yfir leikinn og þeir voru búnir að eyða mikilli orku í að hlaupa á okkur. Við vorum góðir eftir það en skapa aðeins meira."
„Það var ekki kveikt á okkur. Ef við lyftum okkur upp þá vorum við ekki að vinna seinni boltana og þeir mættu til leiks. Voru hrikalega öflugir fyrstu 15-20 mínúturnar en svo var eitthvað stress eða eitthvað en við kveiktum á okkur loksins."
Það eru níu stig eftir í pottinum og tveir heimaleikir framundan hjá Leikni. Sigurður segir liðið eiga góða möguleika.
„Níu stig eftir. Þetta er högg en erfiður völlur að koma hingað en þegar FH mætir til leiks er þetta hörkulið með frábæra leikmenn en þetta er mikið högg miðað við hvernig við spiluðum hérna eftir fyrstu 15-20 mínúturnar. Nú eigum við tvo heimaleiki, gyrða okkur og aðeins meira hungur sem þarf að sjást í hópnum og þá erum við til alls líklegir," sagði hann í lokin.
Athugasemdir
