Heimild: mbl
Eggert Aron Guðmundsson og Andri Fannar Baldursson eru báðir á mála hjá IF Elfsborg í efstu deild sænska boltans en fá lítinn sem engan spiltíma undir stjórn Oscar Hiljemark þjálfara.
Eggert Aron gaf kost á sér í stutt viðtal við mbl.is þar sem hann talaði meðal annars um að fá ósanngjarna meðferð frá þjálfaranum.
Eggert Aron gekk til liðs við Elfsborg í vor og er með tæplega fjögur ár eftir af samningi sínum við félagið. Andri Fannar er þar á lánssamningi frá ítalska félaginu Bologna.
Lánssamningur Andra Fannars rennur út um áramótin og verða þá aðeins sex mánuðir eftir af samningi hans við Bologna, en hann er 22 ára gamall.
„Staðan er erfið, ég þarf að halda áfram að leggja hart að mér. Þetta er brekka núna en ég hef fulla trú á að þetta komi. Við erum með sterkt lið og við unnum Roma í síðustu viku. Mér líst vel á þjálfarann en hann hefur verið ósanngjarn gagnvart mér persónulega og Andra sem er frábær leikmaður. Ég hef sýnt á æfingum að ég á fullt erindi í þetta lið. Tækifærið hlýtur að fara að koma," sagði Eggert í samtali við mbl.
„Ég ræddi við þjálfarann um helgina og vildi fá að vita stöðuna mína og hún er orðin ljós núna. Það er æðislegt að vera hluti af svona góðu liði en á sama tíma er maður aldrei sáttur ef maður er ekki að spila fótbolta.
„Þetta gæti farið á þá leið að ég skipti um félag, en ég og minn umboðsmaður þurfum að skoða það eftir tímabilið."
Athugasemdir
