Evrópudeildin: Williams í banastuði fyrir toppliðið

Inaki Williams skoraði bæði mörk Athletic Bilbao sem vann 2-0 útisigur gegn Fenerbahce í Evrópudeildinni. Bilbæingar eru á toppi deildarinnar, ósigraðir með sextán stig.

Fyrra mark leiksins kom á fimmtu mínútu þegar heimamenn gerðu skelfileg mistök í vörninni, Samet Akaydin sendi beint á mótherja og Gorka Guruzeta renndi boltanum á Williams sem átti ekki í vandræðum með að skora.

Williams skoraði sitt annað mark og annað mark Bilbao rétt fyrir hálfleik með frábæru skoti úr þröngri stöðu í teignum en boltinn fór í stöng og inn.

Heimamenn luku leiknum með tíu leikmenn eftir að Mert Müldür fékk sitt annað gula spjald og þar með rautt á 69. mínútu. Fenerbahce er í 15. sæti, sem er umspilssæti, en það á ýmislegt eftir að ganga á á morgun þegar fjölmargir leikir verða í keppninni.