Tindastóll er komið áfram í 8-liða úrslit Mjólkurbikars kvenna eftir sigur á Stjörnunni á Samsungvellinum.

Stjarnan fékk fyrsta tækifæri leiksins þegar Eyrún Embla Hjartardóttir átti skot sem Genevieve Crenshaw í marki Tindastóls varði vel. Stjörnukonur fengu tækifæri í fyrri hálfleiken Genevieve var með allt á hreinu.

Tindastóll náði forystunni eftir tæplega klukkutíma leik. Það skapaðist darraðadans inn á teig Stjörnunnar eftir aukaspyrnu, Makala Woods náði til boltans sem barst á Kathrine Grace Pettet sem skoraði.

Makala hefði getað innsiglaði sigurinn undir lok leiksins en skot hennar úr dauðafæri beint á Auði Sveinbjörnsdóttir Scheving í marki Stjörunnar.

Það var dramatík í lokin því Stjarnan skoraði í uppbótatíma. Nicola Hauk komst í boltann eftir fyrirgjöf og var næstum því búin að skora sjálfsmark en Genevieve bjargaði á síðustu stundu. Snædís María Jörundsdóttir var fljót að átta sig og kom boltanum yfir línuna.

Framlengja þurfti því leikinn en Tindastóll komst yfir eftir aðeins fjögurra mínútna leik í framlengingunni. Makala lagði boltann á Maríu Dögg Jóhannesdóttir sem skoraði með hnitmiðuðu skoti í hornið.

Jakobína Hjörvarsdóttir komst í frábært færi undir lok leiksins en skotið beint á Geneieve. Saga Ísey Þorsteinsdóttir innsiglaði sigur Tindastóls stuttu síðar með góðu skoti upp í þaknetið.