„Mér fannst þetta vera sanngjörn niðurstaða. Mér fannst vera fá færi í þessum leik, við vörðumst frábærlega allan leikinn og það var kannski lykillinn að þessu. Við tökum þetta stig og höldum áfram," sagði Magnús Már Einarsson, þjálfari Aftureldingar, eftir 0-0 jafntefli gegn FH á Kaplakrikavelli í kvöld.
Heimir Guðjónsson, þjálfari FH, sagði að Aftureldingu hefði tekist vel að drepa tempóið í leiknum.
Lestu um leikinn: FH 0 - 0 Afturelding
„Það var svo sem ekki ætlunin. Við vildum hafa tempó í leiknum en það var kannski bara á ákveðnum augnablikum, þegar við vorum að kasta þessum löngu innköstum inn í teiginn. Það tekur tíma að koma mönnum inn í teiginn. Jú, jú ef Heimir vill meina það, þá fór svo sem alveg tími í þessi löngu innköst."
Nýliðarnir úr Mosfellsbæ sitja í 10. sæti deildarinnar með 11 stig. Nú er landsleikjahlé að skella á og fá liðin tækifæri, til þess að skerpa á leik sínum.
„Þetta er svona allt í lagi. Þetta er búið að vera upp og niður hjá okkur. 11 stig í 10 leikjum er ágætt en við viljum meira og munum gefa í eftir landsleikjahlé."
Viðtalið má nálgast í heild sinni í spilaranum að ofan.
