Nígeríski sóknarmaðurinn Emmanuel Dennis er á förum frá Nottingham Forest þar sem ekkert pláss er fyrir hann í byrjunarliðinu undir stjórn Steve Cooper.
Dennis kom að fjórum mörkum í nítján úrvalsdeildarleikjum með Forest á síðustu leiktíð, en þar áður hafði hann verið algjör lykilmaður í liði Watford sem féll.
Dennis fann ekki taktinn með nýjum liðsfélögum í Nottingham og missti sæti sitt í leikmannahópinum í sumar.
Það er þó mikill áhugi á honum víðs vegar um heim þar sem rússnesk og tyrknesk félög eru meðal þeirra sem hafa sett sig í samband við Forest, en Dennis virðist vera á leið til Tyrklands sem stendur.
Fótboltafréttamaðurinn Fabrizio Romano heldur því fram að Dennis geti valið á milli Adana Demirspor og Istanbul Basaksehir, sem hafa bæði boðist til að fá hann á lánssamningi sem gildir út tímabilið.
Þessi 25 ára gamli sóknarmaður hefur í heildina komið að 20 mörkum í 52 leikjum í ensku úrvalsdeildinni og gæti reynst gríðarlega öflugur liðsstyrkur í tyrknesku ofurdeildinni.
Dennis, sem á 8 landsleiki að baki fyrir sterkt lið Nígeríu, er samningsbundinn Nottingham Forest næstu þrjú árin.
