Valur og Fram áttust við í loka leik 10.umferðar Bestu deildarinnar. Valur vann 2-1 og framundan er tveggja vikna landsleikjahlé. Rúnar Kristinsson þjálfari Fram ræddi við Fótbolta.net eftir leik á Hlíðarenda í kvöld.
„Gríðarleg vonbrigði og pirringur yfir því að tapa leiknum."
Lestu um leikinn: Valur 2 - 1 Fram
„Valsmenn fá tvö mörk á silfurfati frá okkur og ég hefði alveg verið til í að tapa leiknum ef þeir hefðu spilað okkur sundur og saman og skora tvö góð mörk en ef við erum að gefa þeim tvö mörk þar sem það er markspyrna yfir allan völlinn og Oliver (Elís Hlynsson) klikkar á því að skalla boltann til baka á markmann og Kennie missir boltann á miðjunni og það er ein sending í gegn og Patrick Pedersen er einn áa móti markmanni og það er ekki leiðin sem þú vilt tapa fótboltaleikjum."
„Ég hefði vilja sjá okkur pressa þá betur í fyrri hálfleik en Valsmenn eru vel spilandi og þeir leystu þetta ofboðslega vel. Ég var ekki nógu ánægður með varnarvinnuna í fyrri hálfleik og stundum er það bara þjálfaranum að kenna frekar en strákunum og planið sem við settum upp virkaði kannski ekki alveg."
„Ég sá það klárlega á mínum mönnum og það er komin þreyta í öll lið og við erum líka bara í manneklu. Fred, Tryggva og Frey, þrjá miðjumenn í meiðslum. Magnús Ingi er meiddur og einhverjir fleiri og Már er heldur ekki með og þetta tekur á okkur en ég ætla ekki að kvarta yfir þessu því það eru öll lið að lenda í því sama." sagði Rúnar en hann á von á að flest allir sem voru á meiðslalista Fram í kvöld verða klárir eftir landsleikjahlé.
Athugasemdir
