Lokaumferðin í A-deild Þjóðadeildar kvenna fór fram í kvöld og voru nokkrir stórleikir á dagskrá, þar sem Svíþjóð fékk Danmörku í heimsókn í úrslitaleik um toppsæti.
Svíar gerðu sér lítið fyrir og rúlluðu yfir nágranna sína með sex mörkum gegn einu. Stina Blackstenius skoraði þrennu og gaf eina stoðsendingu í stórsigrinum.
Svíar enda því í efsta sæti riðilsins með 12 stig, tveimur stigum fyrir ofan Ítalíu sem vann örugglega á útivelli gegn Wales. Hin 35 ára gamla Cristiana Girelli skoraði tvennu og gaf eina stoðsendingu í 1-4 sigri Ítala.
England tapaði þá toppslagnum gegn Spáni og endar í öðru sæti á meðan Belgía náði þriðja sætinu með frábærum sigri í Portúgal. Belgar heimsóttu Portúgali í úrslitaleik um þriðja sætið og sigruðu örugglega með þriggja marka mun til að bjarga sér frá falli.
Að lokum skoraði Þýskaland sex mörk á útivelli gegn Austurríki á meðan Holland gerði þýðingarlaust jafntefli við Skotland. Þýskaland var þegar búið að tryggja sér toppsætið og Holland annað sætið fyrir leiki kvöldsins.
Þess má geta að Noregur sigraði gegn Sviss til að tryggja sér 2. sætið í íslenska riðlinum. Ísland endar í 3. sæti eftir annað tap gegn Frakklandi.
Svíþjóð 6 - 1 Danmörk
Wales 1 - 4 Ítalía
Spánn 2 - 1 England
Portúgal 0 - 3 Belgía
Sviss 0 - 1 Noregur
Ísland 0 - 2 Frakkland
Austurríki 0 - 6 Þýskaland
Holland 1 - 1 Skotland
Athugasemdir
