Xavi Simons er búinn að skipta um umboðsmann fyrir sumarið. Þessi tvítugi sóknartengiliður er að klára stórkostlegt tímabil með PSV Eindhoven þar sem hann á 18 mörk og 12 stoðsendingar í 45 leikjum á tímabilinu.
Xavi þykir gríðarlega mikið efni og gæti snúið aftur til Paris Saint-Germain í sumar þar sem Frakklandsmeistararnir eru með endurkaupsrétt á honum.
PSG vildi upprunalega lána Xavi til PSV en þegar hollenska félagið vildi bara kaupa hann var ákveðið að setja endurkaupsrétt í samninginn.
PSG getur því keypt Xavi aftur til sín í sumar, en lokaákvörðunin mun þó liggja hjá leikmanninum.
Nýi umboðsmaður Xavi Simons heitir Darren Dein og hefur verið maðurinn á bakvið ýmis stór félagaskipti í gegnum tíðina.
Athugasemdir