Uli Höness, fyrrum leikmaður og forseti FC Bayern, fór aftur í tímann í huganum og minntist samtals sem hann átti við David Alaba fyrir nokkrum árum.
Hinn austurríski Alaba yfirgaf fyrrum Evrópumeistara FC Bayern á frjálsri sölu í sumar til að ganga í raðir Real Madrid. Draumur Alaba var þó ekki að fara til Real, heldur Barcelona.
„David Alaba sagði einu sinni við mig að draumurinn væri að spila í Barcelona einn daginn. Ég svaraði þá: 'Viltu semja við forsetann eða gjaldþrotabúið?' Barcelona er ekki lengur fyrirmynd í þessum efnum," sagði Höness við Expressen.
Bayern mætir Barcelona í fyrstu umferð riðlakeppni Meistaradeildarinnar í kvöld og telur Höness Bæjara vera sigurstranglegri.
„Bayern er sigurstranglegra því Barcelona á í fjárhagsvandræðum og er ekki uppá sitt besta eftir leikmannasölur."
Athugasemdir
