Olmo kom með beinum hætti að 13 mörkum í 25 leikjum með Leipzig á síðustu leiktíð.
Spænski miðjumaðurinn Dani Olmo vonast til að vera keyptur frá RB Leipzig í vikunni eftir að hafa gert frábært mót á EM í Þýskalandi.
Olmo var í lykilhlutverki hjá Spáni eftir að hann kom inn í byrjunarliðið fyrir Pedri sem meiddist og hefur verið orðaður við ýmis félög eftir frammistöðu sína á mótinu, þar á meðal Englandsmeistara Manchester City.
Samkvæmt heimildum Fabrizio Romano er Man City þó ekki með í kapphlaupinu um Olmo, sem skoraði þrjú mörk og gaf tvær stoðsendingar í fimm leikjum á EM til að hjálpa Spánverjum að standa uppi sem sigurvegarar á mótinu.
Olmo á þrjú ár eftir af samningi hjá Leipzig og hægt er að búast við því að leikmaðurinn muni ekki yfirgefa þýska félagið í ár, nema að hann verði keyptur í þessari viku. Það er vegna riftunarákvæðis í samningi hans við Leipzig sem gildir til næsta laugardags.
Olmo er falur fyrir 60 milljónir evra þar til að ákvæðið rennur út um næstu helgi.
Athugasemdir
