Ejub Purisevic, þjálfari Víkings Ó., var skiljanlega ósáttur með leik sinna manna gegn ÍA í Pepsi-deildinni í kvöld.
Skagamenn unnu 3-0 og eru Ólafsvíkingar búnir að tapa fimm Pepsi-deildar leikjum í röð.
Skagamenn unnu 3-0 og eru Ólafsvíkingar búnir að tapa fimm Pepsi-deildar leikjum í röð.
„Skaginn var með leikinn í sínum höndum og þeir voru bara betri allan tímann," sagði Ejub sem er ekki mikið fyrir að tala undir rós.
„Fátt gekk upp, það vantaði baráttuvilja og leikgleði. Fólk var fljótt að gefast upp á meðan Akranesmenn hlupu á eftir boltanum og pressuðu. Ég er engan veginn sáttur með hvernig við vorum að spila."
Ejub var spurður hvort Ólafsvíkingar, sem byrjuðu tímabilið frábærlega, gætu endað í fallbaráttu eftir fimm tapleiki í röð.
„Við erum í fallbaráttu núna, það er bara svoleiðis. Við spiluðum vel fyrri hluta tímabilsins og sýndum meiri leikgleði og miklu meiri grimmd og aga, en núna virtust voða litlir hlutir taka okkur úr jafnvægi. Ef við spilum svona þá er bara ekki von á góðu.
„Við verðum að breyta þessum hlutum til að lenda ekki í fallbaráttu, það er eina leiðin. Þetta verður að breytast verulega."
