Það hefur skapast mikill rígur á milli Breiðabliks og Víkings síðustu ár
Víkingar urðu í dag bikarmeistarar í fjórða sinn í röð eftir 3-1 sigur á KA en hamingjuóskirnar komu úr öllum áttum og þá var meira að segja hægt að finna þær á ótrúlegustu stöðum.
Lærisveinar Arnars Gunnlaugssonar eru hársbreidd frá því að vinna tvöfalt í ár.
Liðið gæti orðið sófameistari í Bestu deildinni þegar Valur spilar við Stjörnuna á morgun en mikill rígur hefur verið á milli Breiðabliks og Víkings undanfarin ár og þá sérstaklega á þessu tímabili.
Þetta eru án nokkurs vafa tvö bestu lið Íslands í dag en Víkingur hefur vinninginn á þessu ári, að minnsta kosti innanlands, á meðan Breiðablik varð á dögunum fyrsta liðið til að komast í riðlakeppni í Evrópu.
Leikir Breiðabliks og Víkings hafa boðið upp á mikil læti, föstum skotum í fjölmiðlum og alls konar Hollywood-stemningu, en gott grín fylgir einnig þessum mikla ríg.
Stórt auglýsingaskilti hangir fyrir utan Fífuna, knatthúsi Breiðabliks, en á skiltinu má finna hamingjuóskir til Víkinga fyrir að hafa unnið Mjólkurbikarinn.
Jón Stefán Jónsson, aðstoðarþjálfari HK, vekur athygli á þessu á Twitter og fagnar þessu góðlátlega gríni.
Auglýsingaskiltið við hlið Fífunnar í kvöld...
— Jón Stefán Jónsson (@Jonsi82) September 16, 2023
Fyrir aðdáanda góðs banter þá er þetta eiginlega dásamlega gott þó ég sé hlutlaus í þessum ríg. pic.twitter.com/XQkW8iMNNv
Athugasemdir
