Sveindís og Cecilía eftir leik Íslands og Belarús í fyrra.
Á landsliðsæfingu í dag.
Maður vill ekkert vera spá of mikið í þeim, við förum bara í okkar leiki til þess að vinna
„Leikurinn á móti Wales leggst vel í mig, við erum spenntar að spila við góð lið í Þjóðadeildinni," sagði Sveindís Jane Jónsdóttir, leikmaður kvennalandsliðsins, fyrir æfingu dagsins.
Framundan eru leikir við Wales og Þýskaland í nýrri Þjóðadeild. Fyrri leikurinn er heima gegn Wales og seinni leikurinn í þessum landsleikjaglugga fer svo fram í Þýskalandi.
Framundan eru leikir við Wales og Þýskaland í nýrri Þjóðadeild. Fyrri leikurinn er heima gegn Wales og seinni leikurinn í þessum landsleikjaglugga fer svo fram í Þýskalandi.
„Voða lítið," sagði hreinskilin Sveindís sem brosti þegar hún var spurð hvort hún vissi hvernig Þjóðadeildin virkaði. Keppnisfyrirkomulagið er ekki það einfaldasta. „Ég veit bara að við þurfum að vinna leikina. Ég er ekkert mikið að pæla í öðru, en við auðvitað förum í alla leiki til að vinna."
„Við erum nýkomnar saman, vorum á fundi og erum búnar að fara nokkuð vel yfir þetta. Við spiluðum við þær fyrir nokkrum mánuðum, erum með einhverjar klippur úr leikjum sem við ætlum að bæta og eitthvað sem við ætlum að nýta sem við gerðum vel."
„Stemningin er mjög góð, nokkrar nýjar og það er gaman að fá ný andlit. Það er alltaf gaman að koma hingað og gaman að sjá stelpurnar."
Sveindís og Cecilía Rán Rúnarsdóttir eru góðar vinkonur en engin Cecilía er í hópnum vegna meiðsla sem hún varð fyrir á dögunum.
„Það er rétt, það er smá vont - högg. En það kemur einhver önnur, skemmtilegri örugglega, í staðinn," sagði Sveindís á léttu nótunum.
Spennandi deild
Tímabilið í Þýskalandi er nýfarið af stað og vann Wolfsburg gegn Bayer Leverkusen um helgina.
„Deildin úti er spennandi, held hún sé að verða betri og alltaf erfitt að spila fyrsta leik - maður veit ekki mikið um andstæðinginn. Við byrjuðum vel og það er fyrir öllu," sagði Sveindís sem skoraði þriðja markið í 3-0 sigri.
Þýsku meistararnir í Bayern, helsti samkeppnisaðili Wolfsburg, tapaði stigum í fyrstu umferðinni. Setur það blóð á tennur Úlfynjanna í Wolfsburg?
„Ég veit það ekki, það byrjaði eins hjá þeim í fyrra, gerðu jafntefli í fyrsta leik en unnu svo deildina. Maður vill ekkert vera spá of mikið í þeim, við förum bara í okkar leiki til þess að vinna."
Uppáhaldsstaðan er að byrja inn á
Sveindís var spurð hvort eitthvað benti til þess að hún væri eða yrði í öðruvísi hlutverki hjá Wolfsburg á síðasta tímabili.
„Já og nei. Við erum með ógeðslega marga sóknarmenn og þjálfararnir eiga alltaf mjög erfitt með að velja liðið. Ég vona að ég fái að byrja inn á í sem flestum leikjum. En ég er allavega ennþá á kantinum."
„Hægri eða vinstri, alveg sama. Uppáhaldsstaðan mín er að byrja inn á," sagði Sveindís á léttu nótunum. „Kanturinn er uppáhaldið, en ég er til í að spila bara hvar sem er."
Markmiðið hjá Wolfsburg er að vinna deildina. „Alveg 100%, Wolfsburg á alltaf að vera í toppbárattu eða vinna deildina. Við viljum auðvitað líka taka bikarinn, það er hefð eiginlega bara. Okkur langar að gera betur en í fyrra," sagði Sveindís.
Leikurinn á föstudag hefst klukkan 18:00 og fer fram á Laugardalsvelli. Smelltu hér til að kaupa miða.
