Alex Þór Hauksson var öflugur í dag.
Alex Þór Hauksson var fyrirliði íslenska U20 ára landsliðsins í 3-0 tapinu gegn Englendingum í kvöld en hann var nokkuð sáttur með frammistöðu liðsins.
Lestu um leikinn: England U20 3 - 0 Ísland U20
Íslenska liðið spilaði vel í fyrri hálfleik og munaði litlu að liðið myndi leiða þegar gengið var til búningsherbergja en í þeim síðari gekk enska liðið á lagið og skoraði þrjú mörk.
„Maður er alltaf stoltur að vera fyrirliði íslenska landsliðsins og ég reyndi að leiða strákana áfram og í fyrri hálfleiknum vorum við að standa okkur vel. Við héldum þeim í skefjum og náum að skapa nokkur mjög góð færi en vantaði klíník sóknarleika og þá hefðum við farið 1-0 eða 2-0 yfir í hálfleik," sagði Alex Þór við Fótbolta.net.
„Það hefði verið högg í andlitið á þeim og gott að fara fullir sjálfstraust inn í hálfleik. Þetta er æfingaleikur en við komum í þennan leik sem hörkuleik og ætluðum að sýna hvað við gátum."
Alex segir getumuninn ekki mikinn á liðunum heldur vantaði herslumuninn í dag.
„Mér fannst það alls ekki. Fótbolti á þessu leveli eru pínulítil atriði hér og þar. Þeir skora úr fyrsta færinu á meðan við þurfum 3-4 til að skora, þar liggur munurinn."
Alex Þór var í því hlutverki að halda Angel Gomes, leikmanni Manchester United, í skefjum og tókst það ágætlega.
„Það er alltaf gaman að prófa sig á þeim bestu og mér fannst ég gera vel að halda honum og öðrum í skefjum. Þeir voru ekki að skapa eins mikið og þeir hefðu viljað og þá var kominn pirringur í þá. Þá er okkar djobb klárað," sagði hann ennfremur.
Hægt er að sjá viðtalið í heild sinni hér fyrir ofan.
