Max Allegri var rekinn frá Juventus á dögunum eftir óviðeigandi hegðun hans í krinum úrslitaleik ítalska bikarsins og stýrði því Paolo Montero liðinu í kvöld.

Juventus lenti þremur mörkum undir. Riccardo Calafiori skoraði strax á 2. mínútu eftir hornspyrnu. Juventus-menn náðu engan veginn að hreinsa boltanum úr teignum og datt boltinn fyrir Calafiori í miðjum teignum, sem setti hann örugglega í netið.

Santiago Castro skallaði Bologna í tveggja marka forystu níu mínútum síðar. Stuðningsmenn Juventus voru óánægðir með þessa byrjun og fóru beint í það að kyrja söngva um Allegri.

Calafiori gerði annað mark sitt snemma í síðari hálfleiknum áður en Juventus tók við sér.

Federico Chiesa minnkaði muninn á 76. mínútu áður en þeir Arkadiusz Milik og Kenan Yildiz gerðu tvö mörk á tveimur mínútum til að bjarga stigi.

Ágætis redding hjá Juventus en liðið er þó fyrir neðan Bologna á markatölu fyrir lokaumferðina.

Hellas Verona hefur nú formlega bjargað sér frá falli eftir að liðið vann botnlið Salernitana, 2-1. Tomas Suslov og Michael Folorunsho skoruðu mörk Verona í fyrri hálfleiknum en Giulio Maggiore gerði eina mark Salernitana undir lok leiks.

Verona er nú fjórum stigum fyrir ofan fallsæti þegar ein umferð er eftir.

Bologna 3 - 3 Juventus
1-0 Riccardo Calafiori ('2 )
2-0 Santiago Castro ('11 )
3-0 Riccardo Calafiori ('53 )
3-1 Federico Chiesa ('76 )
3-2 Arkadiusz Milik ('83 )
3-3 Kenan Yildiz ('84 )

Salernitana 1 - 2 Verona
0-1 Tomas Suslov ('22 )
0-2 Michael Folorunsho ('45 )
1-2 Giulio Maggiore ('90 )