„Það er léttir að við höfum klárað þetta. Þetta leit ekki sérstaklega vel út. Leiknismennirnir lögðu þennan leik vel upp og gerðu okkur mjög erfitt fyrir," sagði Hannes Þór Halldórsson, markvörður Vals, eftir sigur á uppeldisfélagi sínu, Leikni, 1-0 í Pepsi Max-deildinni.
Lestu um leikinn: Valur 1 - 0 Leiknir R.
„Við höfum þurft að hafa fyrir þessu á þessu tímabilinu sem gefur manni von um það að við eigum helling inni. Við erum sammála um að við eigum fullt inni en samt erum við búnir að ná í 13 stig af 15 mögulegum. Við þurfum aðeins að fara að skerpa frammistöðuna í fyrri hálfleik sérstaklega."
Landsliðshópurinn var tilkynntur í dag og þar var ekki nafn Hannesar. Það kom á óvart enda er Hannes búinn að vera lykilmaður í landsliðinu síðustu ár.
„Það er ekki mitt að svara fyrir það. Það er eins og það er. Það verður að spyrja þjálfarana út í það."
„Þetta er utan landsleikjaglugga, sem sagt með Mexíkó leikinn. Ég held að þetta verði skrautleg ferð, það taka ekki allir þátt í öllum leikjum og þannig. Þetta var svolítið fram og til baka (á milli Vals og KSÍ). Ég hef engar skýringar á þeim ákvörðunum sem eru teknar, það verður að ræða við þjálfarana."
„Það var rætt við mig og farið yfir þetta. Þessi ferð þróaðist öðruvísi en upphaflega var planað, ég held að það hafi verið einhver mannekla með þennan hóp. Ég vil ekki vera að fara út í smáatriði, það er ekki mitt að svara fyrir það. Það er allt í góðu og við ræddum um framhaldið sem er í haust."
Hægt er að horfa á viðtalið við Hannes í heild sinni hér að ofan.
Athugasemdir