Giorgi Mamardashvili, Georgía - Hefur verið orðaður við ensku úrvalsdeildina og hlutabréfin hafa hækkað í sumar. Þessi 23 ára markvörður Valencia hefur átt fleiri vörslur en nokkur annar á EM.

Georges Mikautadze, Georgía - Þessi 23 ára sóknarmaður Metz í Frakklandi hefur skorað bæði mörk Georgíu á mótinu. Var hjá Ajax þar sem tækifærin voru af skornum skammtin en hefur sýnt með Metz og Georgíu hvaða ógn hann getur skapað.

Nico Williams, Spánn - Átti marga aðdáendur fyrir EM og þeim hefur bara fjölgað. Þessi 21 árs leikmaður Athletic Bilbao er einn umtalaðasti vængmaður Evrópuboltans enda óútreiknanlegur fyrir andstæðingana.

Christian Eriksen, Danmörk - Byrjaði aðeins tíu úrvalsdeildarleiki fyrir Manchester United á síðasta tímabili en þessi 32 ára miðjumaður hefur verið frábær fyrir þjóð sína á EM. Skoraði gegn Slóvenum og hefur átt fleiri lykilsendingar en nokkur annar á mótinu.

Pierre-Emile Höjbjerg, Danmörk - Annar miðjumaður sem fær ekki mikið að spila hjá sínu félagsliði. Tottenham er til í að hlusta á tilboð í þennan baráttuglaða miðjumann sem valinn var maður leiksins gegn Englandi.

Nicolas Seiwald, Austurríki - Austurríkismenn hafa verið harðir í horn að taka á EM og þar er Seiwald lykilmaður sem varnartengiliður á miðsvæðinu. Aðdáunarverð vinnusemi hjá þessum 23 ára leikmanni sem byrjaði bara sex leiki með RB Leipzig á síðasta tímabili.

Ferdi Kadioglu, Tyrkland - Þessi 24 ára fjölhæfi bakvörður Fenerbahce hefur verið orðaður við Arsenal en verður bara eftirsóttari. Hann skorar hátt í mörgum tölfræðiþáttum; til dæmis tæklingum, knattraki og sendingum.

Federico Chiesa, Ítalía - Líklegt er að hann yfirgefi Juventus í sumar enda á hann ár eftir af samningi. Þessi 26 ára leikmaður stóð ekki undir væntingum á síðasta tímabili þó hann hafi skilað níu mörkum og tveimur stoðsendingum. Mikilvægur hlekkur hjá Ítölum og einn besti leikmaður liðsins sem vann EM.

Riccardo Calafiori, Ítalía - Þessi 22 ára varnarmaður vakti mikla athygli fyrir frábæra leiktíð með Bologna. Hefur unnið sér sæti í ítalska landsliðinu og hlotið mikið lof. Sjálfsmarkið gegn Spáni ætti ekki að eyðileggja það orðspor sem hann hefur skapað.

Roman Yaremchuk, Úkraína - Er ekki fyrstur á blað, hvorki hjá landi né liði, en sýndi mikilvægi sitt þegar hann kom af bekknum gegn Slóvakíu og skoraði sigurmarkið. Valencia gæti verið opið fyrir því að selja sóknarmanninn, sérstaklega þegar verðmiðinn hækkar.